Фантастичниот тркачки Ferrari 410 Sport Spider by Scaglietti ќе биде продаден на аукција организирана од RM Sotheby's во август.
Легендарниот Енцо Ферари го осмисли моделот 410 Sport Spider додека бараше начин да обезбеди титула во Светскиот шампионат за спортски автомобили во 1955 година. За да дојде до титулата мораше да направи автомобил кој може да биде добар на патеките, но и успешно да го заврши петдневното рели Карера Панамерикана низ Мексико.
За потребите на шампионатот дизајнираше е нова шасија 519/C заедно со тубуларна рамка, а инсталираше и 5.0-литарски V12 мотор кој развиваше 400 КС. Беа произведени само две копии од автомобилот, но релито Карера Панамерикана беше откажано, па автомобилите учествуваа на Светскиот шампионат за спортски автомобили во 1956 година.
Примерокот на фотографиите ја носи ознаката 0598 CM, а првично го возеа Хуан Мануел Фанџо и Еуџенио Кастелоти. По успешното деби на трката на 1.000 километри во Буенос Аирес во јануари 1956 година, автомобилот беше испратен во фабриката на Ferrari, а подоцна беше купен од Џон Едгар. После тоа, Керол Шелби го возеше за тимот на Едгар и постигна серија победи.
Автомобилот беше толку добар што го импресионирал Шелби.
„Ништо не може да му се приближи на ова Ferrari ако работи“, рече тогаш Шелби за Los Angeles Times.
Подоцна, ова Ferrari го возеа Ричи Гинтер и други, а автомобилот беше повлечен од трките во 1960 година и продаден. Новиот сопственик го врати во светот на трките во 1963 година и учествуваше на трката Дејтона Континентал 3 Часа. Правилата бараа фиксен покрив, така што беше направен за ова Ferrari, но ја наруши аеродинамиката па на крајот сопственикот сепак го користеше 250 GTO.
Ferrari 410 Sport Spider повторно е „пензиониран“ и се чува во колекција веќе две децении. Беше купен и реставриран во 1980 година од Хауард Коен, а оттогаш автомобилот смени неколку сопственици. Оригиналниот резервоар за гориво ги содржи зборовите на Шелби кои велат: „Господинот Ферари ми кажа дека ова е најдоброто Ferrari што некогаш го направил“.