По специјалните модели со V12 мотор како Omologata и BR20, новата уникатна креација на Ferrari има V8 мотор, а тоа е моделот SP48 Unica.
Ferrari SP48 Unica е базиран на моделот F8 Tributo, но тоа не може да се каже на прв поглед бидејќи каросеријата е значително редизајнирана.
Уникатната креација ја нарачал долгогодишен клиент на Ferrari кој учествувал во развојот на автомобилот и може да се каже дека тој го имал последниот збор во секој чекор од процесот.
Создадена е целосно нова предна решетка со помош на техники за процедурално-параметриско моделирање и 3D прототипови. Влијанието на моделот Roma е забележливо бидејќи SP48 Unica има сличен тридимензионален ефект на предната решетка што му дава на суперавтомобилот свеж дизајн во споредба со познатиот F8 Tributo како и 488 и 458.
Задниот дел е поелегантен од порано бидејќи задното стакло е отстрането, а четирите тркалезни задни светла се заменети со тенки LED линии кои потсетуваат на Roma. Промените се забележливи и на профилот, а покрај новите бандажи, SP48 Unica има различни странични всиснувачи позиционирани малку пониско. Црните прагови заземаат малку поголема површина.
Фотографија од внатрешноста сè уште нема, но познато е дека најмногу е позајмена од моделот F8 Tributo. На десната страна на контролната табла е ознаката SP48 Unica, а седиштата се обложени со ласерски перфориран алкантар, кој е присутен и на други места.
Нема детали за можни механички промени, па овој „специјалец“ веројатно го има истиот 3,9-литарски твин-турбо V8 мотор кој работи на F8 Tributo, кој развива 710 КС и 770 Nm вртежен момент. F8 Tributo „катапултира“ од 0 до 100 km/h за 2,9 секунди и достигнува 200 km/h за 7,8 секунди пред да достигне максимални 340 km/h.
Цената сè уште не е објавена.
