Возачот на Ферари, Себастијан Фетел, се врати зад воланот на автомобилот во Формула 1 за првпат од паузата што ја наметна пандемијата од коронавирусот. Четирикратниот светски шампион, заедно со неговиот тимски колега Шарл Леклер, тренираа со автомобилот на патеката „Муџело“.
Ова беше прв тест на Формула 1 на патеката по 8 години, кога во 2012 година Фетел возеше за последен пат со тимот на Ред Бул. Фетел, исто така, ја коментираше патеката, за која многу се шпекулира дека е голем кандидат за влез во календарот во Формула 1 подоцна оваа година. Причината е откажување на многу натпревари надвор од Европа.
– Со задоволство се вратив во автомобилот по толку невобичаена пауза во Формула 1. За мене зимата е исклучително долга, а сега моравме да почекаме уште подолго до нашето враќање на патеката. Не можев да дочекам да ги видам момците од тимот по толку долго време. Беше огромно задоволство да се доживее уникатното чувство за излегување на автомобилот од гаражата по сето ова време. Патеката овде е импресивна и навистина мислам дека „Муџело“ заслужува и треба да се врати во календарот во Формула 1. Јас не сум бил овде веќе 8 години, но после еден круг започнав навистина да уживам, изјави Германецот.
Патеката „Муџело“ во наоѓа на 25 километри од Фиренца во регионот Тоскана, Италија.
