На седницата на Управниот одбор на Фудбалската федерација на Македонија се донесе одлука клубовите да бидат ослободени од плаќањето котизација за учество во домашните лиги наредната сезона.
Поради кризата со коронавирусот која го погоди целиот свет, настрадаа и македонските фудбалски клубови. Задолжителната котизација која се уплаќа на две рати пред почетокот на првата и втората полусезона нареднава сезона нема да биде проблем на клубовите ширум земјава бидејќи ФФМ одлучи да се стави во мирување сѐ со цел да им помогне на клубовите.
Сите клубови од Првата лига, двете групи од Втората лига, како и петте групи од Третата лига за нареднава сезона 2020/21 нема да плаѓаат котизација за учество. Во општинските Четврта и Петта лига котизација не се плаќа.
Котизацијата, иако непопуларна мерка, беше воведена со цел да се спречи ненадејното истапување од лига на клубовите, нешто што во минатото често се случуваше. На тој начин, клуб што платил, а се откажал, бадијала ги фрлил парите.
Прволигашите и минатава сезона на некој начин беа ослободени. Имено, парите кои ФФМ ги доби од ТВ правата од Arena Sport, наместо да ги подели по клубовите ги уплати од нивно име како котизација.
