Поради влошување на пандемијата во Мкаедонија, Фудбалска федерација денеска одржа вонредна видео-конференција на која беше одлучено да се стави крај на прекинатото првенство и тоа без прогласување на шампион, како на купот.
„Следејќи ја здравствената состојба во нашата држава, посебно во последните неколку денови и ситуацијата со позитивните тестови на вирусот COVID-19 потврдени кај неколкумина фудбалери од ФК Ренова и ФК Шкендија, потоа процесот на самоизолација од две седмици кои треба да го помине целиот тим на ФК Ренова, како и неможноста во вакви, вонредни услови, земајќи го во предвид и ограничувањето на движење, клубовите да го продолжат тренинг процесот пропишан во здравствениот протокол, Управниот одбор донесе одлука да ја прекине натпрварувачката сезона 2019/2020 во 1.МФЛ“, информира ФФМ.
За ваквата непопуларна одлука од ФФМ веднаш ја известиле УЕФА.
Се очекува реакција од ФК Вардар, кој како лидер со дури 10 бодови предност пред второпласираниот, е најоштетен во оваа новонастаната ситуација. Во другите прекинати првенства ширум Европа, лидерот беше прогласуван за шампион и оттаму останува нејасно зошто ФФМ реши да прогласи крај без шампион.
ОД ФФМ велат дека бидејќи процесот за лиценцирање сѐ уште е во тек, екипите кои ќе се напреваруваат во европските купови допрва ќе бидат потврдени. Според моменталниот пласман, во квалификациите за Лигата на шампиони треба да игра Вардар, чија лиценца виси поради големите долгови. Силекс како втор и Шкендија како трета ќе играат во квалификациите за Лига Европа, каде место веројатно ќе добие и четвртопласираната Ренова поради тоа што и Купот на Македонија нема да се доигра.
Во Босна и Херцеговина исто така беше прогласен крај, а Сарајево стана шампион со само 3 бодови предност пред вториот. Титули со прекинати првенства добија и Селтик во Шкотска, Бриж во Белгија и ПСЖ во Франција.
Не беше прогласен шампион во прекинатото првенство на Холандија, но таму ситуацијата е многу поинаква бидејќи првото место го делат Ајакс и АЗ со ист број на бодови. Веројатно таму работата ќе стигне до судските органи бидејќи Ајакс има подобра гол-разлика, но АЗ има подобар меѓусебен дуел откако двапати го совлада ривалот.