На денешниот состанок помеѓу десетте прволигаши и ФФМ беа презентирани три можни сценарија околу иднината на прекинатата тековна сезона.
Фудбалската федерација на Македонија даде три предлози за завршување на сезоната:
- Одигрување на четирите преостанати кола од третиот круг, а потоа преминување на одигрување на плеј-оф (првите 6 екипи по завршување на третиот круг). Првопласираните три екипи по крајот од плеј-офот се стекнуваат со право на учество во УЕФА европските натпреварувања. Плеј-аут (последнопласираните 4 екипи по завршување на третиот круг) СО ИСПАЃАЊЕ на последните две екипи по крајот од плеј-аут фазата. Одигрување на Купот на Македонија со еден полуфинален натпревар и финален натпревар. Победникот од Купот на Македонија обезбедува пласман во УЕФА европските натпреварувања;
- Одигрување на четирите преостанати кола од третиот круг, а потоа преминување на одигрување на плеј-оф (првите 6 екипи по завршување на третиот круг). Првопласираните три екипи по крајот од плеј-офот се стекнуваат со право на учество во УЕФА европските натпреварувања. Плеј-аут (последно пласираните 4 екипи по завршување на третиот круг) БЕЗ ИСПАЃАЊЕ на последните две екипи по крајот од плеј-аут фазата. Одигрување на Купот на Македонија со еден полуфинален натпревар и финален натпревар. Победникот од Купот на Македонија обезбедува пласман во УЕФА европските натпреварувања;
- Прекин на првенството и Купот на Македонија.
Клубовите сега треба да се изјаснат кој предлог го прифаќаат и потоа ФФМ да донесе конечна одлука.
„Како натпреварувачка комисија на ФФМ го претставивме нашиот план и трите можни сценарија за евентуално продолжување на првенството од 1.МФЛ во поинаков формат од предвидениот. Сметам дека е сосема јасно првото можно решение, со испаѓање на два тима по завршување на понудениот формат.
Веројатно многумина ќе се запрашаат во делот од второто сценарио каде системот на натпреварување исто така содржи плеј-оф и плеј-аут фаза, но без испаѓање. Тоа го правиме од причина што во Куп натпреварувањето имаме екипи кои би можеле да се најдат во делот од плеј-аут фазата и заради одржување на натпреварувачки ритам би одиграле само 3 натпревари наместо предвидените 6. Календарот на натпревари ќе го усогласиме во зависност од мерките кои ќе важат на ниво на држава, но секако и од одлуката на Фудбалската федерација на Македонија за конечно решение за завршување на натпреварувачката сезона“, изјави Игор Франговски, претседател на Комисијата за натпреварување во ФФМ.
На состанокот беше презентиран и протоколот со мерки кои секој клуб треба да ги преземе за тренирање и одигрување натпревари. Протоколот може да се преземе со клик тука.
„Институтот за јавно здравје се обврза да обезбеди 400 тестови за COVID-19 кои би ги опфатиле сите фудбалери и стручни штабови на десетте клубови, како и за официјалните лица за натпреварите од 1.МФЛ“, велат од ФФМ.