Распоредот за новата сезона во најквалитетната македонска фудбалска лига ќе биде познат во понеделник кога во ФФМ ќе биде направена жрепката.
Жрепката ќе почне точно на пладне (12:00 часот) во понеделник во просториите на „Куќа на фудбалот“, односно домот на Фудбалската федерација на Македонија.
Учество ќе земат сите 10 клубови кои во минатата прекината сезона се натпреваруваа во Првата лига: Академија Пандев, Борец, Вардар, Македонија ЃП, Работнички, Ренова, Силекс, Струга, Шкендија и Шкупи, плус двете првопласирани од прекината сезона во двете второлигашки групи, Беласица и Пелистер. Со тоа, вкупно 12 екипи ќе бидат во жребувањето.
Жрепката ќе ги одреди броевите на клубовите според кои потоа веднаш ќе биде познат и распоредот на натпревари. Со оглед на тоа што има 6 екипи кои делат три стадиони, посебни услови ќе бидат земени предвид при жребувањето за во исто коло да не се погодат да играат на домашен терен Академија Пандев и Беласица, Вардар и Работнички, како и Ренова и Шкендија.
Сезоната 2020/21 во прволигашката конкуренција треба да почне викендот на 8 и 9 август.