Полуножичките на Бразилецот ја победија конкуренцијата и му ја донесоа наградата на ФИФА за најдобар гол на Мундијалот 2022.
Бразилскиот репрезентативец Ришарлисон џи Андраде е прогласен за автор на најубавиот гол на штотуку завршеното Светско првенство во Катар.
Напаѓачот на Тотенхем овој гол го постигна уште во 1. коло од фазата по групи кога Бразил со 2:0 славеше против Србија. Тогаш Ришарлисон во 73. минута погоди за конечни 2:0 мајсторски совладувајќи го немоќниот Вања Милинковиќ-Савиќ.
Винисиус Жуниор продре по левата страна, нафрли во срцето на српскиот шестнаесетник каде топката ја прими Ришарлисон и со маестрален удар ја затресе мрежата.
Во конкуренција за најубав гол на Мундијалот се најде уште еден негов погодок, оној против Јужна Кореја, како и головиоте на Енцо Фернандес, Килјан Мбапе, Нејмар, Коди Гакпо и Венсан Абубакар.
