Светската фудбалска федерација (ФИФА) одобри сите репрезентации кои ќе учествуваат на Светското првенство во Катар да имаат на располагање најмногу 26 играчи, а дополнително ќе бидат дозволени пет измени во регуларните 90 минути.
На сите репрезентации кои годинава ќе се натпреваруваат на Светското првенство во Катар ќе им биде дозволено да поведат 26 играчи, што е за три повеќе од претходното Светско првенство во Русија во 2018 година, што многу ќе им ја олесни работата на многу селектори.
Од друга страна, јасно е дека ќе има многу играчи кои ќе бидат само набљудувачи на турнирот во Катар и кои иако ќе бидат со тимот нема да имаат минутажа, а ФИФА им дозволи и на тренерите пет измени во регуларните 90 минути.
Петте измени станаа пракса како резултат на пандемијата на коронавирус, кога многу тимови имаа уморни играчи во жесток ритам на игра, но се чини дека тоа беше планирано претходно и дека ФИФА само го искористи тој момент за да го забрза процесот на промена на правилата.
Светското првенство во Катар ќе се игра од 21 ноември до 18 декември.