Не постои законска пречка за прием на вакцините против COVID-19 во нашата земја. Првите дози на вакцината Pfizer која е договорена во директни преговори со производителот, како и 8.000 дози вакцини кои од Република Србија треба да пристигнат во нашата земја ќе бидат со интервентен увоз. Измената на Законот за лекови е поради глобалната политика на Pfizer кои инсистираа апликант за регистрацијата на вакцината да биде нивното претставништво кое е со седиште во Холандија, одговорно за овој дел на Европа, вели министерот за здравство Венко Филипче.
Тој посочува дека Србија е единствената земја во целиот регион каде има локално претставништво на Pfizer и тоа на некој начин им ги забрза работите.
– Но, и тоа не е пречка свесни дека е таква нашата законската регулатива, производителот Pfizer, се согласи првите количини вакцини кои ќе дојдат во нашата земја и преку директниот договор, но и преку помошта од Србија да дојдат со т.н интервентен увоз, за што има законска регулатива и за тоа не треба регистрација, вели Филипче.
Производителот Pfizer, потенцира министерот, на нашата земја ѝ излезе во пресрет, несакајќи да се забави динамиката на пристигнување на вакцините.
– Со оглед на тоа што инсистираат регистрацијата да се случи кога тогаш, несакајќи да ја забават динамиката на пристигнување на вакцините, се согласија тоа да биде за следните количини, во следните месеци поради тоа што ние поднесовме измена на Законот за лекови во Собранието за да овозможиме, оваа конкретна вакцина да се регистрира преку апликант кој не е регистриран како компанија во нашата земја, појаснува Филипче.
Што се однесува до испораката на вакцините од Република Србија, Филипче нагласува дека во моментов се чека одобрување од компанијата Pfizer за интервентен увоз.
– Во интензивна комуникација сме со компанијата изминатите два дена, паралелно на нашите разговори во врска со нашиот директен договор, сега се чекаат и фајловите за да се дозволи таа количина од Србија да биде пратена во нашата земја. Тоа значи дека компанијата Pfizer води сметка за буквално сите количини кои ги дистрибуира во земјите, дали и на кој начин евентуално се препраќаат во некои други земји, додава министерот.
Во врска со измените на Законот за лекови, Филипче, како што информираат од Министерството за здравство, изминатиов период имаше средби со пратеници на опозицијата кои во разговор со него изразија поддршка и конструктивност за измените на Законот.
Што се однесува до вакцините кои во земјава треба да стигнат преку Ковакс механизмот, министерот посочува дека на 29 јануари ќе има состанок со претставниците од тој систем кога се очекува да добие информации кога и во кои количини вакцини ќе стигнат во нашата земја.
– Здравствениот систем и сите други институции во државата се подготвени за процесот на вакцинација. Ние сме целосно спремни. Утрово имав состанок со директорот за Агенцијата за лекови (МАЛМЕД), тамошните служби се целосно спремни да ги пречекаат документите, да ги издадат потребните формулари, административни. Укажавме на директорот на Царината и во таа служба се спремни вработените сите постапки да се завршат во најкраток временски рок. Ние сме спремни со нашата инфраструктура, фрижидерите веќе се инсталирани, може тука да се складира огромна количина на вакцини. Подготвен е и планот за вакцинација. Секако здравствените работници се први. Така што во моментот кога ќе пристигнат вакцините имаме план по кој ќе се постапува, истакнува Филипче.
