Министерот за здравство Венко Филипче се обрати до новинарите и медиумите воопшто, со апел да не се објавуваат шпекулативни и непроверени бројки на новозаразени со COVID-19.
„Деновиве голем број на медиуми уште рано наутро објавуваат неофицијални и речиси секогаш неточни информации за бројот на новозаболени. Од самиот почеток на оваа криза лично јас и целиот мој тим за односи со јавноста сме ваш партнер. Веќе 100 дена навремено, прецизно и транспарентно ја известуваме јавноста. Ги соопштуваме сите детали за новозаболените од COVID-19, сѐ со цел медиумите да имаат точна информација“, го почнува Филипче апелот.
„Уште еднаш ги замолувам медиумите да престанат да изнесуваат шпекулативни и непроверени информации околу бројот на заболени лица од COVID-19. Ги молам да ја зачуваат својата улога и задача која ја имаат кон јавноста за навремено, точно и проверено известување“, апелира Филипче.
Понатаму министерот напиша дека е „непримерно во ситуација кога имаме секојдневно заболени и секојдневно известуваме и за секоја најмала промена, да се шпекулира со податоци токму од страна на оние кои треба да обезбедат прецизна информација за јавноста“.
Тој нагласи дека со тоа се внесува конфузија кај населението и недоверба во институциите, а тој искрено верува дека ова не е целта.
„Објавувањето број на новозаразени со COVID-19 од страна на медиумите не смее да биде трка на ексклузивитет, затоа што станува збор за чувствителни информации за здравјето и животот на граѓаните“, истакна Филипче.
Министерот на крај додава дека објавувањето на вакви непроверени информации е уште повеќе несфатливо затоа што Министерството за здравство редовно ги објавувало сите информации, а доколку имало промени и по неколку пати во денот. Сите прашања на новинарите се одговараат постојано и на дневно ниво, нагласи Филипче и за крај изрази надеж дека „оваа пракса ќе престане, а ние ќе продолжиме со навременото и точно информирање“.