Славниот американски боксер Флојд Мејведер, кој наскоро ќе полни 46 години, го победи јутјуберот Деџи Олатуњи со технички нокаут во шестата рунда.
Борбата се одржа во Дубаи, а станува збор за егзибициски меч, петти во кариерата на Мејведер откако професионалниот дел го заврши со резултат од 50 победи и ниту еден пораз.
Мејведер борбата навистина ја сфати како егзибиција и поголем дел од неа ја помина забавувајќи ја публиката, танцувајќи низ рингот и предизвикувајќи го јутјуберот кој има над 10 милиони следбеници на YouTube.
Во еден момент реши да отиде чекор понапред во забавувањето, па во паузата меѓу првата и втората рунда презеде улога на ринг девојка која носи број на рундата, па гордо се прошета по рингот.
Сепак, во шестата рунда му здосади да изведува глупости, па одлучи да ја прекине борбата. Запиша победа со технички нокаут и сè уште е непоразен во егзибициски борби.
Пред борбата, 25-годишниот Деџи, кој има една победа и три порази во аматерскиот и професионалниот бокс, изјави дека целта му е да упати еден голем удар кон шампионот.
На крајот изгледа и успеа во тоа, со оглед дека Мејведер заврши со модринка под левото око, ја заработи по ударот во четвртата рунда.
Интересно е што од целата борба, јутјуберот помина без модринки.
„Мило ми е што ме удри, ова и така беше за забава. Добар борач е, само нека продолжи со добрата работа“, порача Мејведер.
Деџи по борбата порача дека очекува нова против друга славна личност, како на пример Џастин Бибер или Лајам Пејн. Им порача дека ги очекува во рингот.