Автомобилскиот гигант Ford планира да намали 12.000 работни места во претставништвата низ Европа до крајот на 2020 година.
Американскиот автопроизводител се обидува да ги намали трошоците и да ги реструктурира бизнисите во Европа кои покажуваат загуби.
Компанијата планира да затвори пет фабрики до крајот на следната година, вклучувајќи ја фабриката за мотори во Бриџенд, Велс и да продаде уште една.
Ford има 51.000 вработени ширум Европа и се надева дека поголемиот дел од намалувањето на работните места ќе се изврши со доброволни заминувања со поволни пакети за отштета.
Целиот автомобилски сектор се соочува со намалена побарувачка на главните пазари и има големи трошоци околу префрлањето кон електрични возила.
Ford соопшти дека од тие 12.000 најавени намалувања, 2.000 ќе се однесуваат на вработени со договор, а останатите се привремени и хонорарни вработени.
„Одвојувањето од вработените и затворањето фабрики се едни од најтешките одлуки што ги правиме и знаеме дека се одразуваат на семејствата и заедниците, но ние ќе пружиме поддршка за да го олесниме процесот“, рече Стјуарт Раули, претседател на Ford за Европа.
