Третата доза од вакцината против COVID-19 на компанијата AstraZeneca и Универзитетот во Оксфорд се покажа добро во производството на антитела и дополнително ја зголеми ефикасноста на вакцината кај учесниците во истражувањето, соопшти денеска весникот Financial Times.
Веста доаѓа во момент кога производителите на вакцини предупредуваат дека на светот најверојатно секоја година ќе му треба дополнителна доза или нови вакцини за зајакнување на нивниот ефект како резултат на развојот на новите мутации и варијанти на вирусот, иако некои научници се сомневаат во оправданоста и потребата од трета доза, пренесуваат британските медиуми.
Весникот цитира изјава на лице упатено во резултатите од истражувањето, кое вели дека реакцијата на антителата на дополнителната доза од вакцината е „доволно силна против која било варијанта на коронавирусот“.
Британските медиуми пренесуваат дека истражувањето, исто така, покажало дека има помалку страв дека аденовирусите не можат да се користат повеќе од еднаш.
AstraZeneca и Универзитетот во Оксфорд сè уште не одговориле на барањето на Reuters за подобро разјаснување на резултатите од истражувањето, кое сè уште не е официјално објавенo, а FT пишува дека сè уште не е познато кога Оксфорд и AstraZeneca планираат да ја објават оваа информација.
Вакцината AstraZeneca се темели на нова технологија што користи модифицирана верзија на аденовируси, кои предизвикуваат обична настинка, како вектори за пренесување на одговор до човечките клетки.
Поради ваквиот начин на дизајнирање вакцини, некои научници веруваат дека дозите би можеле да изгубат на својата ефикасност доколку станат годишни вакцинации неопходни во борбата против новите варијанти на коронавирусот.