Натпреварите во Црна Гора, за разлика од многу други европски фудбалски првенства, ќе се играат со присуство на публика, одлучи црногорската Влада на чело со премиерот Душко Марковиќ.
„Ќе бидат дозволени свадби, крштавки, ограничен број на публика на спортските настани со почитување на соодветните мерки“, изјави Марковиќ.
Будуќност е лидер на табелата со 11 бодови повеќе од двојниоот првак Сутјеска, а првенството продолжува во сабота.
За разлика од Фудбалскиот, Одбојкарскиот и Ракометниот сојуз на Црна Гора ги поништија натпреварувањата од 22 април, а иако во меѓувреме беше дозволено да се тренира, истото го направи и Кошаркарскиот сојуз на 14 мај по консултација со клубовите.
Публика на натпреварите е дозволено да има само во Белорусија, а останатите лиги кои добија зелено светло од владите да се рестартираат, ќе се играат без физички присутна публика на трибините.
Првенствата во Франција, Холандија и Белгија се целосно откажани и нема да се доиграат.
Според најновите податоци, во Црна Гора има 324 регистрирани случаи на COVID-19, од кои 315 оздравеа и девет починаа.