Пау Гасол и неговата штотуку породена сопруга одлучија името на нивната принова да биде Џијана, во чест на трагично загинатиот Коби Брајант и неговата ќерка.
Каталонскиот центар и неговата сопруга Кетрин МекДонел добија ќерка на која ѝ го дадоа името Елизабет Џијана Гасол, а средното име е токму по 13-годишната ќерка на Коби Брајант која загина заедно со него во хеликоптерската несреќа на 26 јануари годинава.
„Нашето малечко конечно пристигна!! Породувањето мина навистина добро и ние сме пресреќни!! Елизабет Џијана Гасол, многу значајно име за нашата преубава ќерка!!“, напиша Гасол на Twitter.
Гасол и Брајант заедно играа во Лос Анџелес Лејкерс цели 7 години (2008-2014), а за тоа време станаа и добри пријатели. Пау летово со своето семејство беше на гости кај вдовицата на Коби, а токму Ванеса ќе биде кума на новороденчето.
Пау и Кетрин се во брак од јули 2019 година.