Стратегот на тимот од Бергамо признава дека Интер, Милан и Наполи имаат нешто што на неговата Аталанта сезонава ѝ недостасува поради што неговиот тим не е кандидат за титулата.
В сабота од 18 часот Аталанта ќе му гостува на Интер, па по таа пригода Џан Пјеро Гасперини зборуваше со новинарите.
„Интер, Милан и Наполи имаат нешто повеќе од нас и поради тоа нема логика да се стремиме кон Скудетото. Торино и Фиорентина се на исто ниво како нас“, вели популарниот Гасп кој на чело на Аталанта е од јуни 2016 година.
„Интер сезоната ја почна добро, и покрај продажбите. Лукаку им беше главна алка во тимот, се навикнаа нападите да им одат полесно ослонувајќи се повеќе на него. Беа неверојатни лани, ефективни и силни. Многумина помислија дека ќе ги погоди продажбата на Лукаку, но тие пронајдоа други решенија“.
Под негово водство тимот од Бергамо почна да растура во Серија А, но никогаш не успеа да освои трофеј. На двапати губеше во финалето од Копа Италија (2019 и 2021), а во Серија А минативе три години завршува како третопласирана.
Во престет на 6. коло кое е на програмата викендов Аталанта со 10 бодови е на 5. место, додека Интер е втор со 13, колку што има и Милан. Лидер со максимален скор од 15 бодови е Наполи.