Од 1 јануари тимот на Ферари наводно ќе има нов прв човек, а тоа ќе биде Фредерик Васер, кој на таа позиција ќе го замени Матиа Биното, пренесува La Gazzetta dello Sport. Од италијанскиот тим истакнаа дека нема основа за шпекулации за статусот на Биното.
Според извори на италијанскиот весник со розеви страници, Васер веќе поминал тест во Ферари во текот на летото, кој го спровел претседателот на компанијата Џон Елкан, бидејќи раководството во Маранело веќе почнало да размислува кој би можел да го наследи Биното.
Од 2019 година Биното е шеф на Ферари, чии редови се приклучи уште во 1995 година, а со текот на годините напредуваше во клупската хиерархија. Пред сегашната функција тој две години беше технички директор на италијанскиот тим.
Откако Биното е на чело на тимот, Ферари премина од очај во слава и назад, но чекањето за титулата продолжи и во својата 16-та сезона. Италијанскиот тим брилијантно влезе во новата ера на Формула 1, бидејќи Шарл Леклер славеше на отворањето на сезоната, но многу брзо следеше доминација на Макс Верстапен и Ред Бул. Во меѓувреме, Монегаскиецот уште двапати стигна до највисокото скалило на подиумот, а неговиот тимски колега Карлос Саинс само еднаш, а сезоната ја одбележаа низа дискутабилни одлуки во однос на стратегијата.
Од друга страна, Васер моментално е првиот човек на Заубер, кој се натпреварува како Алфа Ромео, а на таа позиција се наоѓа повеќе од пет години. Тој претходно беше тимски шеф на Рено.
Малку подоцна од Ферари истакнаа дека гласините се неосновани, и покрај резултатите на тимот.
Овогодинешниот шампионат во Формула 1 завршува претстојниов викенд со Големата награда на Абу Даби.
