Гечевски: Наша чест и обврска е да се запамети името на Буштур

Спортскиот директор на Кошаркарската федерација на Северна Македонија, Тодор Гечевски, ја отвори денешната прес-конференција за завршницата од Купот во машка конкуренција со посвета. Посвета кон оној чие име од ова издание ќе го носи националниот Куп „Благоја Георгиевски Буштур“.

„Периодот што измина беше еден тежок за кошарката во Македонија. Изгубивме доста видни личности кои придонесоа за развој на кошарката и она што сме ние денеска, и кошаркари и кошаркарски работници. Од сите имиња кои ги изгубивме, едно име се издвојува, тоа е името на големиот кошаркар, тренер, спортски работник и на крајот еден голем човек – Благоја Георгиевски Буштур“, потенцира Гечевски.

„Ние како раководство на федерацијата едногласно одлучивме дека неговото име треба да биде запишано во историјата, но и во иднината на македонската кошарка, па затоа се договоривме дека во иднина Купот на Македонија ќе го носи неговото име. Наша чест и обврска е да се запамети неговото име, да остане во сеќавањата на сите, да остане како пример на сегашните работници и да остане на едни идни генерации кои следејќи го неговиот пример ќе направат сѐ за македонската кошарка да биде сѐ поголема и поквалитетна, додаде тој.

„Се надевам дека сите присутни овде се надеваат на добра игра, на победи и на крајот на краиштата ние како Федерација се надеваме на добра кошарка и дека најдобриот ќе го однесе пехарот дома. На сите присутни им посакувам среќа и ферплеј, сѐ да заврши како што треба“, заврши спортскиот директор на КФСМ.

Распоред на натпреварите:

Полуфиналните натпревари ќе се играат на 15-ти од 17:00 Победник 1 - Победник 4 и од 19:30 часот Победник 2 - Победник 3, а големото финале е закажано за в недела од 17:30 часот.

Директен пренос од сите четвртфинални и полуфинални натпревари ќе оди на МРТ3, додека големото финале ќе се прикажува на МРТ1.

Сите натпревари ќе се играат во салата на СРЦ „Кале“ во Скопје без присуство на публика.