General Motors, една од најголемите автомобилски компании во светот, планира до 2035 година да запре со производство на коли на бензин и нафта и оттогаш да нуди целосно електричен асортиман.
GM е една од најголемите и традиционални произведувачи на автомобили, кои поставија рок да преминат кон производство на електрични возила, јави The Wall Street Journal. Информацијата всушност е објавена денеска на социјалната мрежа LinkedIn од Мери Бара, генерален директор на General Motors.
Повеќе држави како Јапонија и Обединетото Кралство, како и сојузната американска држава Калифорнија, ветија да ги забранат бензинските и нафтени коли до 2035, но тоа досега не го сторила голема и меѓународна компанија како General Motors.
Ова е прилично радикална одлука на еден од најстарите автопроизводители, бидејќи во моментот 98 проценти од продажбите на компанијата се возила што користат јаглеводородни горива и испуштаат издувни гасови. General Motors произведува големи пикап комбиња и теренски патнички возила со многу мала енергетска ефикасност, а кои што се со најголем удел во нејзините профити.
Во ноември, компанијата соопшти дека до 2025 година ги зголемува инвестициите во хибридни возила со приклучок и технологии за развој на автономни коли до 27 милијарди долари, или повеќе од половина од вкупните капиталните инвестиции планирани за оваа петолетка.
GM исто така цели да запре со употреба на јаглеводородни енергенси до 2040 година, што значи елиминација на издувните гасови од сите свои производствени погони и активности како и елиминација на издувните гасови од возилата што ги изработува.
„Сметаме дека со нашите огромни напори ќе ги охрабриме и другите да го сторат истото оставајќи значајно влијание на нашата индустрија и економија“, истакна Бара.
