Македонија ќе има медал од Олимпијадата во Токио откако теквондистот Дејан Георгиевски обезбеди финале и ќе се бори за златото.
После 21 година и ЛОИ 2000 во Сиднеј, конечно македонски олимпиец ќе се врати со медал. Тогаш борачот Магомед Ибрагимов освои бронза, а сега теквондистот Георгиевски отиде чекор подалеку и ќе се врати дома со злато или најмалку сребро.
Откако утринава прво го елиминираше светскиот шампион Рафаел Алба од Куба, а потоа во четвртфиналето го исфрли и Сејду Гбане од Брегот на Слоновата Коска, предмалку во полуфиналето го совлада и Ин Кјо-дон од Јужна Кореја, земјата од каде и што потекнува овој спорт.
Ин прв освои поен и тоа со неговиот препознатлив стил, удар со рака. Потоа Кореецот доби казнен поен, што беше прв во корист на Георгиевски, за потоа Македонецот со два одлични удари со нога да поведе со 5:1. Георгиевски продолжи да доминира и на крајот со 12:6 обезбеди финале.
Пречка до златото за македонскиот теквондист ќе биде Русинот Владислав Ларин кој во полуфиналето буквално го прегази Кинезот Сун Хонји со 30:3. Борбата е закажана за 14:45 часот по македонско време, а пренос ќе оди на МРТ1.