Берлин 12 август 2020 (МИА) – Само неколку дена по почетокот на новата учебна година, ученици од училиште во Берлин се испратени во самоизолација, затоа што еден ученик е позитивен на новиот коронавирус.
Новата учебна година во Берлин почна во понеделникот.
„Бидејќи заразениот ученик го испративме дома по еден час и добро ја вентилиравме училницата, ризикот од инфекција е мал, но сепак постои“, објаснуваат од училиштето во Берлин-Целендорф и додаваат дека целата паралелка е во домашна изолација.
Во писмото до родителите се вели дека училишната администрација е во контакт со надлежните здравствени власти кои ќе го повикаат секое засегнато семејство.
Укажуваат дека е важно децата дотогаш да немаат контакт со други лица, но не е наведено дали ќе бидат потребни тестови.
Во едно училиште во Берлин-Ноуклин, кај родител на ученик кој се вратил од одмор во странство е пронајдено присуство на вирусот.
Тој родител, како што беше најавено, помогнал во подготовките за новата учебна година и имал контакт со осум други лица, наставници и домарот. Сите тие луѓе сега се во карантин, соопштија од училиштето.