Германската канцеларка Ангела Меркел сака состанок со премиерите на 16 германски покраини за затворање на рестораните и кафулињата почнувајќи од 4 ноември, како обид да го запре ширењето на коронавирусот. Но, градинките и училиштата ќе останат отворени.
Како што пренесе Reuters, повикувајќи се на Bild, Меркел сака да ги затвори фитнес центрите, коцкарниците и кината, како и театрите, операта, да забрани концерти. Продавниците да останат отворени, но да се ограничи бројот на присутни во затворена просторија.
Федералната влада сака да даде финансиска поддршка на компаниите кои ќе бидат на удар поради затворањето, додавајќи дека оваа програма ќе биде презентирана пред јавноста денеска попладне.
Германците ќе може да излегуваат на улица, но само во присуство на членови од семејството или евентуално уште едно семејство.
Кој нема да ги почитува мерките ќе биде казнет. Не се познати деталите за казните.
Хотелите ќе примаат гости, но само во посебни случаи и под услов тоа да не бидат туристи.