Руските ракетни напади во близина на полската граница покажуваат колку малку нè дели од тоа НАТО да се вмеша во конфликтот, пишуваат германските медиуми. Но, случувањата на бојното поле во Украина сугерираат дека наскоро може да се постигне некаков договор.
Во неделата, руската армија истрела повеќе од триесет проектили на воениот полигон Јаворив недалеку од Лавов - само дваесет километри од полската граница. Според украински извори, најмалку 35 лица загинале, а 134 се ранети. Според Москва, во нападот биле убиени „до 180 странски платеници“.
Полигонот претходно се користеше за воени вежби на украинската армија со членките на НАТО, а инструктори на НАТО и САД таму обучуваа украински војници, пишува Deutsche Welle во анализата на германските медиуми.
„Доколку Москва, како што е најавено, цели на испораките на оружје од Запад, може да има нови напади во близина на источната граница на НАТО“, пишува Frankfurter Allgemeine Zeitung. „Не треба да се паѓа на оваа провокација, но не треба ниту да се заплашува. Колку повеќе напредува војната, толку е поголема веројатноста руските трупи да го нападнат и западниот дел на земјата.“
„Имајќи ги предвид актуелните воени проблеми и силата на НАТО, дури и за опасен воен лидер како Путин, тешко би било веројатно да влезе во конфронтација со НАТО сега. Западот треба да се држи до својата стратегија: видлива и веродостојна безбедност на источното крило, проследена со индиректна поддршка за Украина“, се вели во франкфуртскиот весник.
Повеќенасочна порака
Според коментаторот на Ludwigsburger Kreiszeitung, Путин со нападите на Лавов испраќа пораки во неколку правци: „Тој им кажува на Украинците дека не се безбедни ниту на западот на земјата. Но, тоа е порака за НАТО, бидејќи на полигонот наводно имало странски инструктори и набљудувачи. Путин не е подготвен да трпи странска воена помош за Украина и со напад се заканува да ја прекине испораката на оружје на Киев“.
Ракетирањето на полската граница покажува „дека Западот се движи по тенка линија“, пишува весникот Stuttgarter Nachrichten. „Јасно е дека НАТО ќе мора да реагира на евентуален руски напад на Полска, а со тоа и на сопствената територија. Но, доколку НАТО гарантира забрана за летање над Украина, ќе се обврзе да пука врз руски борбени авиони. Така, светската војна не би да биде прашање на километри, туку на време изброено во часови.“
„Западот мора да дејствува, а не само да реагира на Путин“
Весникот Mitteldeutsche Zeitung смета дека стратешките грешки на Кремљ се потценување на подготвеноста на Украина да се спротивстави и преценување на проруските чувства на земјата. Руското население, дополнително, трпи и од санкции.
„Ова е неочекувана шанса за украинскиот претседател Зеленски. Кремљ сè уште смета на воена победа. Украина, од друга страна, може само да се надева на решение на преговарачката маса - дотогаш мора да се спротивстави на нападите, што Зеленски го знае.“
Време е да се „изгради мост“ до Путин, пишува Südwest Presse: „Не од сочувство за Путин, туку што поскоро да се стави крај на страдањата во Украина. Мостот не би ги заменил санкциите, туку ќе се надоврзе“, пишува весникот. Тоа би можело да изгледа вака: „Посилно ги стегаме уздите, но ги олабавуваме ако Путин дојде на преговарачка маса. Западот мора да дејствува, а не само да реагира на Путин“.
