Двата гиганти повторно доминираа на пазарот на паметни телефони во 2025 година.
Глобалните испораки на паметни телефони во 2025 година пораснаа за два проценти на годишно ниво, втора година по ред на раст, благодарение на зајакнувањето на побарувачката за премиум уреди и забрзаното усвојување на 5G технологијата на клучните пазари во развој.
Apple беше водечки производител во 2025 година со пазарен удел од 20 проценти и раст на испораките од 10 проценти на годишно ниво, што е највисок раст меѓу петте водечки брендови, според извештајот објавен денеска од Counterpoint Research.
Растот на Apple беше поткрепен од силната побарувачка на пазарите во развој и средните пазари, како и од успехот на серијата iPhone 17, заедно со солидните резултати од iPhone 16 во Јапонија, Индија и Југоисточна Азија.
Samsung го освои второто место со пазарен удел од 19 проценти и раст од пет проценти, со стабилна побарувачка за серијата Galaxy A во средниот сегмент, додека моделите Galaxy S25 и Fold7 придонесоа за зајакнување на позицијата во премиум класата.
Кинескиот Xiaomi остана трет со 13 проценти пазарен удел, со стабилни испораки благодарение на отпорната побарувачка во земјите во развој и избалансираната понуда на уреди.
Во четвртиот квартал од 2025 година, пазарот на паметни телефони забележа скромен раст од еден процент на годишно ниво, при што Apple постигна рекорден квартален удел од околу 25 проценти од глобалните испораки, додека Samsung беше втор со 17 проценти.
Производителите на паметни телефони ги забрзаа испораките на почетокот на годината поради загриженост за царините, но нивното влијание во текот на годината беше послабо од очекуваното, при што испораките останаа генерално непроменети во втората половина од 2025 година, соопшти Counterpoint на својата веб-страница.
Аналитичарите се претпазливи во врска со развојот на настаните во 2026 година, предупредувајќи на недостиг на DRAM и NAND меморија и повисоки трошоци за компоненти, бидејќи производителите на чипови сè повеќе се фокусираат на производство за центри за податоци со вештачка интелигенција.
Цените на меморијата се зголемија за дури 50 проценти на годишно ниво во четвртиот квартал од 2025 година, а трендот е на пат да продолжи, што би можело да ги зголеми цените на телефоните и да влијае на испораките.
