Возбудата околу серијата телефони Xiaomi 15 сè уште не е стивната, а ние веќе го добивме нашиот прв поглед на дизајнот на моделот Xiaomi 16.
CAD рендерите доаѓаат од MajinBu, типстер кој се покажа како многу сигурен во информациите што ги објавува во последните години.
Објавените рендери покажуваат дека Xiaomi 16 ќе задржи рамни површини на предната и задната страна, а рабовите на страните ќе бидат малку закривени за подобра ергономија.
На задната страна се наоѓа познатиот квадратен остров на камерата, за кој се тврди дека складира три модули од 50 MP, вклучувајќи перископска камера за висококвалитетни зумирани фотографии.
Сепак, детаљот што се издвојува и по кој Xiaomi 16 ќе биде препознатлив е квадратната, стаклена површина под системот на камерата, која, претпоставуваме, ќе се користи за безжично полнење ако остатокот од куќиштето е направен од метал. Или можеби станува збор само за интересен детаљ што е тука за да ја разбие монотонијата и да го направи новиот модел препознатлив.
Како што тврди MajinBu, Xiaomi 16 ќе биде компактен уред чија дијагонала на екранот ќе се мери помеѓу 6,32 и 6,36 инчи, а под површината на куќиштето ќе се наоѓа моќниот чипсет Snapdragon 8 Elite 2 од Qualcomm.
И покрај покомпактните димензии, се тврди дека батеријата ќе има импресивен капацитет од дури 6.800 mAh, а она што е речиси сигурно е дека телефонот ќе работи на HyperOS 3.0, базиран на оперативниот систем Android 16.
Бидејќи Qualcomm ќе го претстави Snapdragon 8 Gen 2 во септември 2025 година, се очекува Xiaomi 16 да биде лансиран истиот месец во Кина, а глобалната премиера да се одржи на саемот MWC 26 во Барселона.
