Топлината на светските океани на длабочина до 2.000 метри достигна највисоко ниво во 2025 година откако започнаа мерењата, и тоа деветта година по ред, според анализата на меѓународна група научници, објавува денес германската агенција dpa.
Во истражување објавено денеска, научниците откриле дека топлинската енергија се зголемила за 23 трилиони мегаџули во 2025 година во споредба со 2024 година. Тим предводен од Лиџинг Ченг од Кинеската академија на науките во Пекинг ги објави наодите од нивната студија, која користела податоци од 1958 година, во списанието Advances in Atmospheric Sciences.
Кога станува збор за просечните температури на површината на морето во светот, 2025 година беше третата најтопла година по 2024 и 2023 година. Истражувачите ја објаснуваат разликата помеѓу длабоките и површинските температури со фактот дека временскиот феномен Ел Нињо во Тихиот Океан значително ослабе во текот на изминатата година.
Ел Нињо обично се поврзува со потопли температури на површината на морето низ целиот свет. При проучувањето на топлината, се вклучени и температурите во подлабоките слоеви на океанот. Затоа, зголемувањето на топлината е релативно помалку под влијание на површинските климатски феномени и се смета за поважен индикатор за глобалното затоплување.
„Океанот апсорбира над 90 проценти од вишокот топлина заробена од стакленички гасови, што го прави главен ладилник за климатскиот систем. Бидејќи топлината на океанот (OHC) ја одразува акумулацијата на топлина во океанот, таа е еден од најдобрите индикатори за долгорочните климатски промени“, напишаа авторите на студијата.
