Ќе ја открива мистеријата на темната материја: Почна да работи најмоќниот телескоп во светот 

Опсерваторијата ќе прави стотици детални фотографии од јужното небо секоја вечер, што треба да даде одговори на некои од најголемите прашања на универзумот.

Една од најмоќните опсерватории во светот конечно започна со работа. Именувана Vera C. Rubin, оваа опсерваторија, сместена на планински врв во Чиле, официјално започна десетгодишна мисија за време на која ќе го фотографира јужното небо секоја вечер со поголема длабочина и детали од кој било друг телескоп досега.

Нејзината огромна камера ќе прави стотици фотографии секоја вечер, а научниците очекуваат тие да обезбедат најдетален поглед на универзумот досега. Целта е да се мапираат милијардите ѕвезди во Млечниот Пат, како и милијардите далечни галаксии кои досега не биле доволно добро проучени.

Особена предност на опсерваторијата е брзината на фотографирање. Камерата ќе прави повеќе слики од истите делови од небото, што ќе им овозможи на истражувачите да забележат многу бледи објекти кои досега им избегале на постојните телескопи.

Првите слики беа направени минатата година, кога опсерваторијата направи спектакуларни слики од соѕвездијата Трифида и Лагуна, оддалечени неколку илјади светлосни години од Земјата. По месеци подесување и тестирање на опремата, системот сега е целосно подготвен за својата главна мисија.

Научниците веруваат дека податоците собрани од  Vera C. Rubin ќе помогнат да се одговорат некои од најголемите прашања во модерната астрономија. Меѓу другото, истражувачите сакаат да откријат како се формираат галаксиите, како се собираат во огромни јата во текот на милијарди години и како изгледал развојот на самиот универзум, пишува CNN.

Опсерваторијата е именувана по познатата астрономка Вера Рубин, која прва пронајде силни докази за постоењето на темната материја. Затоа, истражувачите очекуваат дека оваа камера би можело да донесе нови одговори за темната материја, но и за уште помистериозната темна енергија, која претставува една од најголемите непознати работи на модерната физика.

Проектот е финансиран од Националната научна фондација на САД и Министерството за енергетика на САД, а во текот на следните десет години, опсерваторијата  Vera C. Rubin ќе собере огромна количина на податоци кои би можело да го променат нашето разбирање за универзумот.

Погледнете како изгледаше изградбата на опсерваторијата  Vera C. Rubin: