Компанијата Paradromics успешно вгради имплант во човечки мозок, придружувајќи им се на конкурентите, вклучувајќи го и Neuralink.
Како што е добро познато, Илон Маск е сопственик на Neuralink, компанија која претходно вгради имплант во мозокот, т.н. BCI (brain-computer interface). Сега, Paradromics се придружи на напорите, објавувајќи дека вградиле, а потоа отстраниле BCI уред за време на операција за епилепсија на Универзитетот во Мичиген на 14 мај. Целиот процес траел само 20 минути, што претставува голема пресвртница за компанијата со седиште во Тексас, основана во 2015 година.
BCI е технологија која ги толкува сигналите од мозокот и ги претвора во команди за надворешни уреди. Системот на Paradromics, познат како Connexus BCI, ја снимил невронската активност за време на кратката процедура. Овој потег означува охрабрувачки прв чекор додека компанијата се подготвува за поголеми клинички испитувања.
Иако уредот сè уште не е одобрен од страна на Американската администрација за храна и лекови (ФДА), успешната демонстрација на човечки мозок сигнализира дека технологијата може да биде подготвена да се пресели од лабораторија во клиника.
Пациентот бил закажан за операција на мозок за лекување на епилепсија, дозволувајќи им на истражувачите безбедно да го тестираат уредот под строг надзор. Постапката е прва од многуте планирани во наредните месеци.
Paradromics развива BCI за да им помогне на луѓето со тешки моторни оштетувања како што е парализата. За разлика од некои други системи, Connexus чита сигнали на ниво на индивидуални неврони, обезбедувајќи она што компанијата го опишува како податоци со повисока резолуција.
Neuralink моментално спроведува клинички испитувања и напредува на уред што би можел да го врати говорот.
Synchron, поддржан од Џеф Безос и Бил Гејтс, исто така развива слични технологии, а Precision Neuroscience е исто така во игра.
Paradromics досега собра речиси 100 милиони долари и соработува со проектот NEOM на Саудиска Арабија, нагласувајќи ги своите глобални амбиции.
Откако ќе биде одобрен, Paradromics планира да започне целосно клиничко испитување оваа година за да ја проучи безбедноста на имплантот и потенцијалните долгорочни придобивки за лицата со попреченост.
