Маск ја лансира својата Wikipedia подобрена со вештачка интелигенција

Контроверзниот милијардер Илон Маск во понеделникот лансираше рана верзија на онлајн енциклопедија напишана од вештачка интелигенција и наречена Grokipedia.

Маск веќе долго време најавува создавање услуга која, со помош на вештачка интелигенција, треба да стане конкурент на Wikipedia.

Визуелно, страницата наликува на Wikipedia по стил и формат, иако бројот на содржини и теми е сè уште многу скромен во споредба со Wikipedia. Моментално, на почетната страница на Grokipedia се наведува дека се прикачени 885.000 статии, додека Wikipedia на англиски јазик има повеќе од 8 милиони.

Проектот е најновиот обид на Маск да го користи Grok, систем за вештачка интелигенција сличен на ChatGPT развиен од неговата компанија xAI, за да промовира десничарска нарација за која тој вели дека е цензурирана во Соединетите Американски Држави.

Некои обожаватели на Маск го поздравија неговото деби во понеделникот, додека критичарите посочија примери на статии што содржеа лаги или пасуси што буквално беа копирани од Wikipedia.

Сепак, по тестирањето на пребарувачот, голем број корисници пријавија дека бројни настани се изменети или дека наведените извори не ги одразуваат цитираните реченици.

Во делот за работата на Маск во Министерството за војна на САД, Grokipedia вклучи грешка во врска со кандидатот за гувернер на Охајо, Вивек Рамасвами, тврдејќи дека тој презел „поистакната улога“ по заминувањето на Маск во мај. Рамасвами всушност ја напушти заедничката работна група пред таа да стане дел од администрацијата на Трамп во јануари.

За да го поддржи лажното тврдење, Grokipedia цитираше статии од BBC и Al Jazeera, од кои ниту еден не го спомена Рамасвами.