По 13 години воведување роботи во своите магацини, Amazon достигна нова пресвртница. Компанијата штотуку го „ангажира“ својот милионити робот, кој беше доставен во магацин лоциран во Јапонија.
Amazon сега е на пат кон уште еден пресврт, бидејќи неговата мрежа на магацини наскоро би можела да има еднаков број роботи и луѓе, пишува Wall Street Journal. Исто така, се наведува дека 75% од глобалните испораки на Amazon денес се потпомогнати на некој начин од роботи.
Покрај податоците за роботите, Amazon објави и нов генеративен AI модел наречен DeepFleet, наменет специјално за роботи што се користат во магацини. Овој модел со вештачка интелигенција може многу поефикасно да ги координира рутите на роботите во магацинот, што ќе ја забрза флотата на роботи за 10%.
За да го создаде DeepFleet, компанијата го користеше Amazon SageMaker, студио на AWS кое помага во развојот и пласирањето на модели со вештачка интелигенција. „Амазон“ го обучи моделот на сопствени магацини и податоци.
Милионитиот робот на Amazon е повеќе од бројка. Компанијата ја подобрува својата флота на роботи со текот на годините и додава нови функции и модели. Во мај го претстави својот најнов робот наречен Vulcan, кој има две раце. Едната е дизајнирана за редење пратки, додека другата содржи камера и механизам за вшмукување за собирање предмети. Овој робот има „чувство за допир“, што му овозможува да ги „чувствува“ предметите што ги зграпчува.
Во октомври 2024 година, Amazon ја објави „следната генерација на своите магацини“, која ќе вклучува 10 пати повеќе роботи од оние што моментално постојат, придружувајќи им се на човечките работници. Првиот од овие нови центри се отвори во Шривпорт, Луизијана.
Amazon започна со градење на својот роботски капацитет уште во 2012 година со купувањето на Kiva Systems.
