Пред да се засади цвеќе во урбаните средини за да се привлечат опрашувачите, важно е да се разгледа историјата на почвата и можното загадување.
Дивите цвеќиња во урбаните средини би можеле да апсорбираат токсични метали од почвата и да ги пренесат токсините на опрашувачите, покажа новото истражување, пренесува The Guardian.
Научниците од Универзитетот во Кембриџ открија дека обичните растенија како белата детелина и ползавците, кои се клучни за хранење на опрашувачите во градовите, можат да акумулираат арсен, кадмиум, хром и олово од загадената почва.
Претходните студии покажаа дека овие метали негативно влијаат на здравјето на пчелите и другите опрашувачи кои се хранат со контаминиран нектар, што доведува до намалување на популацијата и смртност. Дури и ниските концентрации на метали во нектарот може да го попречат учењето и меморијата на пчелите, намалувајќи ја нивната способност да бараат храна.
Контаминираните почви најчесто се наоѓаат на места каде што претходно постоеле згради и фабрики, кои испуштале загадувачи во почвата. Сега научниците препорачуваат почвата во урбаните средини да се тестира за присуство на загадувачи и, доколку е потребно, да се исчисти пред да се засадат диви цвеќиња.
Истражувањето, објавено во списанието Ecology and Evolution, беше спроведено во постиндустрискиот американски град Кливленд, Охајо, кој има повеќе од 33.700 напуштени места бидејќи населението се иселило со текот на годините. Некогаш бил центар на индустрии како што се производството на железо и челик, рафинирање на нафта и автомобилска индустрија - сето тоа може да ја загади почвата со метали во трагови.
Научниците извадиле и тестираа нектар од дивите цвеќиња кои се омилени меѓу опрашувачите, а растат низ целиот град. Оловото било постојано присутно во највисоки концентрации, но различни растителни видови акумулирале различни количини и видови на метал.
Растението цикорија (или голица) со светло сино цвеќе (Cichorium intybus) апсорбирало најголема вкупна концентрација на метали, проследено со бела детелина (Trifolium repens), див морков (Daucus carota) и полска повивка (Convolvulus arvensis).
Градовите ширум светот се соочуваат со проблемот на контаминација на почвата со метали, а нивоата на загадување обично се зголемуваат како што стареат зградите. Меѓу загадувачите се споменуваат и цементната прашина и рударската индустрија.
Сепак, авторите на студијата нагласуваат дека луѓето не треба да се обесхрабруваат кога станува збор за садење диви цвеќиња за помош на пчелите.
Д-р Сара Скот, од Катедрата за зоологија при Универзитетот во Кембриџ и главен автор на извештајот, рече: „Многу е важно да има диви цвеќиња како извор на храна за пчелите, а нашите резултати не треба да ги обесхрабруваат луѓето да садат цвеќиња во градовите и населбите. Се надеваме дека оваа студија ќе ја подигне свеста дека здравјето на почвата е исто така важно за здравјето на пчелите. Пред да се засади цвеќе во урбаните области за да се привлечат опрашувачите, важно е да се земе предвид историјата на почвата и потенцијалната контаминација - и, доколку е потребно, да се провери дали има локална служба за тестирање и санација на почвата“.
