За прв пат, производството на електрична енергија од сончеви електрани во Германија би можело да го надмине производството од лигнит - најзагадениот извор на енергија. Земјата брзо се движи кон почист енергетски микс, оставајќи го јагленот зад себе.
Оваа година се очекува соларните електрани во Германија за прв пат да произведат повеќе електрична енергија од термоелектраните на лигнит, објави Германското здружение на соларна индустрија (BSW).
Дополнителни 17,5 гигавати сончева енергија треба да бидат поврзани на мрежата во текот на 2025 година, што дополнително ќе го зголеми вкупниот капацитет.
Минатата година, производството на електрична енергија од јаглен само малку го надмина производството на сончева енергија, па затоа сега се очекува уделот на јагленот дополнително да се намали. Извршниот директор на BSW, Карстен Керниг, изјави дека „чистата сончева енергија веројатно ќе го надмине лигнитот во однос на количината на електрична енергија произведена во Германија до 2025 година“, објави агенцијата DPA.
Според податоците од Институтот „Фраунхофер“ за соларни системи (ISE), електраните на јаглен произвеле 72,8 терават-часови електрична енергија во 2024 година, додека соларните електрани произвеле речиси исто - 72,6 TWh. Ова значи дека лигнитот моментално учествува со 15,61%, а сончевата енергија со 15,57% во вкупното нето производство на електрична енергија во земјата.
Во Германија моментално се инсталирани околу 105 гигавати соларен капацитет, а се очекува понатамошен раст преку т.н. „балконски електрани“ - мали соларни системи за домаќинства - кои, иако сè уште придонесуваат само околу 1%, стануваат сè попопуларни.
