Еден од луѓето што многумина ги нарекуваат „кум на вештачката интелигенција“ издаде застрашувачко предупредување за иднината на вештачката интелигенција.
Според веб-страницата Futurism, Џошуа Бенџо, кој се смета за еден од „кумовите на вештачката интелигенција“, со својата истражувачка работа ги постави темелите врз кои денес почиваат повеќето системи во кои големите технолошки компании инвестираат милијарди долари.
Исто како и неговиот колега Џефри Хинтон, Бенџо го изрази својот страв од последиците од сопствената работа, издавајќи сериозно предупредување за можната иднина на човештвото.
Во интервју за Wall Street Journal Бенџо истакна дека верува оти опстанокот на човештвото е во опасност, особено кога технологијата ќе го достигне нивото на таканаречената вештачка општа интелигенција (AGI) - моментот кога вештачката интелигенција ќе ги надмине човечките способности.
Според многу експерти, тој момент можеби не е далеку, а научникот верува дека тоа би можело да отвори „Пандорина кутија“ за која никој не е подготвен.
„Ако создадеме машини кои се многу попаметни од нас и имаат свој инстинкт за зачувување, тоа ќе биде опасно. Тоа е како да создадеме конкурент на човештвото кој е поинтелигентен од нас“, рече Бенџо.
„Во случај на катастрофални настани како што е истребување, па дури и помалку екстремни, но сепак катастрофални - како што е уништувањето на демократиите - работата е толку сериозна што дури и да имало само еден процент шанса да се случи, тоа не би било прифатливо“, додаде тој.
