Што ќе се случи со вашите уреди кога Microsoft ќе престане да го ажурира Windows 10? Еве ги одговорите и неколку решенија.
Windows 10, популарниот оперативен систем на Microsoft, се приближува до својот крај. Поточно, од 14 октомври 2025 година, Microsoft повеќе нема активно да објавува ажурирања и безбедносни закрпи за овој оперативен систем. Тоа значи дека милиони компјутери ширум светот кои го користат овој систем, всушност, ќе станат незаштитени.
Иако Microsoft веќе им нуди на корисниците „бесплатна“ надградба на Windows 11, многумина не можат да ја искористат таа понуда од неколку причини – или едноставно не сакаат да преминат на новиот оперативен систем, или користат уреди кои не ги исполнуваат минималните услови за Windows 11.
Се поставува прашањето: што ќе се случи со тие милиони уреди кога Microsoft ќе престане да го ажурира Windows 10?
Кратко – ништо драстично. Уредите ќе продолжат да работат нормално. Но, важно е да се знае дека повеќе нема да бидат толку безбедни. Со текот на времето, тие ќе стануваат сè поранливи на потенцијални хакерски и малициозни напади. Искуството покажува дека и „отпишан“ Windows може да се користи (уште има корисници на Windows 7, па дури и на XP), но со текот на времето, користењето станува речиси невозможно, не само поради Microsoft и хакерите, туку и поради тоа што производителите на апликации и програми ќе ги насочат своите нови верзии само кон актуелните оперативни системи. Тоа значи дека нема да можете да ги инсталирате најновите верзии на програмите на компјутер со Windows 10, ниту да ги користите новите функции.
Во зависност од вашата ситуација, постојат неколку избори:
1) Продолжете да го користите Windows 10 додека можете
Компјутерот нема да престане да работи, но со текот на времето (неколку месеци) работата на него може да стане доста непријатна поради безбедносни ризици и недостиг на нови функции.
2) Инсталирајте Windows 11 (ако можете)
Компјутерите произведени во последните неколку години најчесто имаат можност за инсталација на Windows 11. Во поставките на оперативниот систем можете да проверите дали вашиот уред ги исполнува условите. Ако ги исполнува, направете резервна копија на податоците и следете ги упатствата за надградба.
3) Купете нов компјутер што поддржува Windows 11
Ако можете да си дозволите, купете нов компјутер со веќе инсталиран Windows 11 или проверете дали новиот уред ги исполнува условите за инсталација на Windows 11.
4) Задржете го вашиот компјутер, но заменете го Windows
Windows не е единствениот оперативен систем. Можете да го претворите вашиот компјутер во Chromebook со ChromeOS, кој функционира како интернет-прелистувач и поддржува некои Android апликации. Ако ви се потребни Windows апликации, ова нема да биде соодветно решение. Друга опција е Linux, кој е визуелно сличен на Windows, но бара навика и не поддржува Windows апликации директно.
5) Платете на Microsoft за продолжена поддршка
Microsoft ќе понуди можност да се плати за дополнителна година безбедносни ажурирања (Extended Security Updates – ESU). Ова може да ви даде уште малку време пред да преминете на нов оперативен систем.
