Професорот Марк Гуељ од Лабораторијата за синтетичка биологија при Универзитетот „Помпеу Фабра“ во Барселона ја нарече студијата „многу значајна пресвртница“, бидејќи го означува првиот пат кога луѓето дизајнираат биологија со помош на компјутери.
Американски истражувачи успешно користеа вештачка интелигенција (AI) за прв пат за да дизајнираат целосно нови вирусни геноми кои потоа покажаа способност за репликација во лабораторија.
Истражувачите велат дека се создадени 16 нови вируси, но тие инфицираат само бактерии и не претставуваат опасност за луѓето, објави BBC.
Научниците велат дека ова е голем чекор во синтетичката биологија, што би можело да отвори нови можности во лекувањето на болести, но експертите предупредуваат и на потенцијални безбедносни ризици.
„Ова е следното ниво на сложеност што генеративната вештачка интелигенција може да го дизајнира. За прв пат е употребена за создавање комплетен геном што може да се реплицира и да извршува функции во клетките“, рече вонредниот професор на Универзитетот „Стенфорд“, Брајан Хи.
Тим од Универзитетот „Стенфорд“ избра 302 од најперспективните дизајни генерирани од вештачка интелигенција и ги произведе во лабораторија.
Од нив, 16 покажаа способност да ја уништат бактеријата Ешерихија коли.
Научниците веруваат дека оваа технологија би можела да придонесе за развој на нови форми на лекување на бактериски инфекции кои станале отпорни на антибиотици.
Сепак, експертите предупредуваат дека истите алатки покренуваат прашања за биолошката безбедност, бидејќи во иднина би можеле да паднат во рацете на биотерористи и да се користат за создавање поопасни организми.
Во коментар објавен заедно со студијата во списанието Science, експертите од Центарот за здравствена безбедност при Универзитетот „Џонс Хопкинс“ изјавија дека резултатите покренуваат „итни прашања за биолошката безбедност и сигурност“.
Експертите истакнуваат дека вирусите не се живи организми и дека создавањето посложени форми на живот со употреба на вештачка интелигенција би барало многу повеќе истражувања.
Професорот Марк Гуељ од Лабораторијата за синтетичка биологија при Универзитетот „Помпеу Фабра“ во Барселона, Шпанија ја нарече студијата „многу значајна пресвртница“, бидејќи го означува првиот пат кога луѓето дизајнираат биологија со помош на компјутери.
Според него, оваа технологија еден ден би можела да придонесе за создавање нови бактериофаги за лекување на инфекции, ензими за генетски нарушувања и антитела за имунотерапија.
