Откако Манчестер Јунајтед го отпушти Солскјер се очекуваат рокади на едни од најпознатите тренери на денешницата.
Откако Зинедин Зидан експресно одби да биде замената на Оле Гунар Солскјер во Манчестер Јунајтед, а тој патем е слободен агент откако си замина од Реал Мадрид, сега сѐ повеќе се интензивираат шпекулациите дека ќе седне на клупата на ПСЖ.
Зидан конечно би се вратил во татковината каде последен пат со фудбал се занимаваше во 1996 година кога како млад фудбалер ги бранеше боите на Бордо, пред летото истата година да се пресели во Јувентус. Оттогаш ниту играл, ниту бил тренер во Франција.
Како тренер почна во 2013 во Реал како асистент и оттогаш во неколку наврати беше само во тој клуб. Сега, се очекува конечно да се врати во Франција и да го преземе ѕвездениот тим на ПСЖ, каде ќе треба да се справи во фантастичниот напад кој го сочинуваат Меси, Нејмар и Мбапе, а на клупата е Икарди.
ПСЖ има договор со Маурисио Почетино, но Аргентинецот веќе почна да флертува со управата на „Црвените ѓаволи“. Очигледно е дека Почетино повеќе го привлекува островскиот фудбал, а воедно и тешко се справува со купот ѕвезди во Париз кои никако да заиграат како што се очекува.
Но, Почетино ќе мора побрзо да се договори со Јунајтед бидејќи од таму веќе стапуваат во контакт и со други тренери. The Sun тврди дека клубот од Манчестер веќе разговарал со Брендан Роџерс, кој е на чело на Лестер. Тој има договор со клубот и затоа „Ѓаволите“ се подготвени да ги обештетат „Лисиците“ со 8 милиони фунти за северноирскиот стратег веднаш да седне на жешкото столче на „Олд Трафорд“.
