ATP и WTA Tour одлучија да не ги бројат освоените бодови на Вимблдон оваа сезона како одговор на одлуката на најпрестижниот тениски турнир во светот да го забрани доаѓањето на руски и белоруски тенисери оваа година.
Уште во април, Вимблдон објави дека нема да дозволи настап на руски и белоруски тенисери поради руската инвазија на Украина помогната од Белорусија. Британската влада се обиде да ја смени одлуката на организаторите, но залудно.
„Сметаме дека секој тенисер мора да има право да учествува на турнирот без таква дискриминација. Одлуката на турнирот за забрана на руските и белоруските тенисери го нарушува интегритетот на системот за бодување на ATP. Жал ни е, но единствениот чекор што можевме да го направиме беше да се укинат бодовите на овогодинешниот Вимблдон“, стои во официјалното соопштение на ATP.
Пад на Ѓоковиќ на третото место
Најпогоден од ваквата одлука на ATP беше Новак Ѓоковиќ, најдобриот светски тенисер и бранител на титулата на Вимблдон. Ѓоковиќ на тој начин ќе остане без можност за одбрана на 2.000 поени. Неговите први придружници Русинот Даниил Медведев и Германецот Александар Зверев минатата година во Лондон освоија по 180 поени, па сигурно е дека Ѓоковиќ го губи првото место.
Доколку веднаш би се одзеле бодовите од Вимблдон, Медведев, кој годинава нема право на настап во Лондон, би имал 7.800 бодови, Зверев 6.895, а Ѓоковиќ би бил трет со 6.660 бодови. Петтопласираниот Рафаел Надал не ни играше на Вимблдон минатата година, така што нема да загуби ништо.