Новак Ѓоковиќ јавно го критикуваше сопствениот долгогодишен спонзор, францускиот бренд Lacoste, од кој според договорот заработува 10 милиони евра годишно.
Соработката меѓу Ѓоковиќ и Lacoste трае од 2017 година, кога Србинот го облекуваше јапонски Uniqlo, а сега е незадоволен што опремата во која игра големи турнири не може да се најде во продавниците на францускиот моден бренд ширум светот.
„Не сум задоволен од начинот на кој ја прават мојата маркетиншка промоција. Разочаран сум“, изјави Ѓоковиќ во интервју.
Конкретно, во Лондон додека се игра Вимблдон, во овој град навивачите на еден од најголемите спортисти досега не можат да ја најдат неговата опрема во продавниците на Lacoste.
„Последниве години не ми се допаѓа што многу луѓе ми кажуваат дека не можат да ги најдат моите производи во продавниците на моите спонзори. Некои работи сега се менуваат, но јас сè уште не сум задоволен, бидејќи се може да биде многу подобро“, објасни Ѓоковиќ.
Опремата на Ѓоковиќ може да се купи преку интернет, но тој смета дека треба да се најде и во физичките продавници, а му упати и совети на спонзорот.
„Очекувам моите спонзори да го зголемат нивото на производство и квантитет како и неговата достапност за да можат сите да го купат. Нивото на тенис на кое играм е многу популарно во целиот свет“, додаде Ѓоковиќ, кој е пред нов предизвик на Вимблдон денеска, бидејќи во 16 часот е во четвртфиналниот натпревар против Алекс Де Минаур.
Интересно е што договорот меѓу Ѓоковиќ и Lacoste истекува на крајот на годината, а во оваа прилика Србинот очигледно сакал да испрати одредена порака до седиштето на брендот во Париз, каде сега треба добро да размислат доколку сакаат продолжат да работат со најуспешниот тенисер досега.
По ова интервју многумина се на мислење дека Ѓоковиќ најави крај на соработката, а останува да се види што ќе се случи до крајот на годината, односно до истекот на договорот меѓу двете страни.
