УС Опен излезе со официјално соопштение и челниците на овој Грен слем турнир ги објаснија причините зошто Новак Ѓоковиќ е исфрлен од турнирот.
Тие објаснија дека најдобриот српски тенисер ќе биде исфрлен бидејќи ја удри линиската судијка со топче, дека ќе му бидат одземени сите поени што ги заработи на годинашниот турнир, како и бодовите што ги сообра. На судијката ѝ беше укажана лекарска помош.
„Согласно правилникот на Грен слемот за намерно или опасно удирање со топче или непромислено удирање на топчето на теренот или удирање на топчето со занемарување на последиците, судијата на УС Опен го дисквалификува Новак Ѓоковиќ од годинашниот турнир. Поради дисквалификацијата, Ѓоковиќ ќе ги изгуби поените што ги заработи на УС Опен и ќе биде казнет со парична сума во висина од таа што досега ја заработи на турнирот“, стои во соопштението од УС Опен.
Американските медиуми наведуваат дека Ѓоковиќ го молел главниот судија да ја промени одлуката и да не го дисквалификува од турнирот, но судијата наводно му рекол дека немал друг избор.
Ѓоковиќ по дебаклот се огласи на социјалните мрежи.
„Целата оваа ситуација прави да се чувствувам многу тажно и празно. Проверив како се чувствува линиската судијка и според информациите кои ги добив, таа се чувствува добро, фала му на Бога. Не можам да го откријам нејзиното име за да се зачува нејзината приватност. Многу ми е жал што ѝ нанесов таков стрес. Не беше намерно. Беше погрешно. Сакам ова непријатно искуство, дисквалификувањето од турнирот, да го претворам во важна животна лекција, за да продолжам да растам и да се развивам како човек, но и како тенисер. Се извинувам на организаторите на УС Опен. Многу сум благодарен на тимот и на семејството што ми даваат силна поддршка, како и на моите навивачи кои секогаш се со мене. Ви благодарам и жал ми е. Ова беше тежок ден за сите“, напиша Ѓоковиќ.
