По олабавувањето на рестриктивните мерки за заштита од коронавирусот во земјава, кината на отворено понудија богата програма за љубителите на филмот.
Билетите, кои се бесплатни или по симболична цена, брзо се резервираат, и поради големиот интерес и поради ограничениот број, имајќи предвид дека публиката и на отворено седи на растојание од препорачаните метар и пол до два.
Летното кино на отворено во Кинотека, како дел од European Film Challenge, почна на 10 јули со проекцијата на македонскиот филм – добитник на престижната LUX Prize за најдобар европски филм за 2019 – “Господ постои, името ѝ е Петрунија“, во режија на Теона Стругар Митевска.
Со десет наслови во овој исклучителен циклус - кој го опфаќа творештвото на Чаплин од неговите почетоци па сè до последните дела – Кинотеката ќе овозможи увид во најдоброто од златната ера на немиот филм, но и начинот со кој Шарло се справува со предизвикот на звучниот филм.
И Младинскиот културен центар во Скопје најави „Кино [на трева] во МКЦ“ на 17 и 18 јули.
На репертоар ќе бидат „Portrait of a Lady on Fire“ (2019) на 17 јули (петок) и „Everybody Knows“ (2018) на 18 јули (сабота).
Од МКЦ нагласуваат дека Настаните ќе бидат реализирани по соодветен протокол, запазувајќи ги препорачаните мерки за заштита и замолуваат присутните да се придржуваат до нив.
„Доколку сакате да имаме културна програма ова лето, ве молиме грижете се за себе и другите. Придржувајте се до мерките и протоколите“, апелираат тие.
Бројот на места за седење е ограничен, а на проекциите може да се влезе само со бесплатни билети кои може да се набават преку bileti.mkc.mk.
Двете проекции почнуваат во 21 часот, а обезбеден е превод на македонски јазик.