Марк Касадо (21), дефанзивниот играч за врска на Барселона, кој беше заменет поради повреда на првенственото дерби со Атлетико, кое Барса го доби (4:2), нема да игра до крајот на сезоната.
Барселона соопшти дека тој сериозно ги повредил лигаментите на десното колено. Фабрицио Романо додава дека клубот и стручниот штаб се убедени дека за Касадо сезоната 2024/25 година е завршена.
Ова е голем хендикеп за Барселона бидејќи младиот Касадо оваа сезона стана член на првиот тим. Тој одигра 36 натпревари на кои постигна еден и асистираше за шест гола. Касадо стана шпански репрезентативец поради одличните настапи за Барселона оваа сезона, а сега Барса ќе мора без него на крајот од сезоната во која се бори за Ла Лига, Купот на кралот и Лигата на шампионите.
Касадо е дете од Барселона, кој дојде преку Ла Масија. Дефинитивно беше промовиран во првиот тим оваа сезона. Transfermarkt неговата вредност ја проценува на 30 милиони евра.
