На светските берзи минатата недела цените на акциите паднаа бидејќи на почетокот на новата година немаше вести кои би можеле да го поддржат натамошниот раст на берзанските индекси, по силниот скок минатата година.

Dow Jones изгуби 0,6 отсто минатата недела, на 42.732 поени, додека S&P 500 се лизна за 0,5 отсто, на 5.942 поени, а индексот Nasdaq 0,5 отсто, на 19.621 поени.
Во последната година, овие индекси пораснаа силно - Dow Jones повеќе од 13 проценти, S&P 500 повеќе од 24 и Nasdaq околу 30 проценти. Ваквиот силен раст е благодарение на еуфоријата за развојот на вештачката интелигенција, намалувањето на каматните стапки од страна на американската централна банка и победата на Доналд Трамп на претседателските избори во САД, бидејќи се очекува тој да придонесе за растот на економијата со своите политики и спроведување на дерегулација во неколку области.
Сепак, откако ФЕД соопшти дека планира да го забави темпото на намалување на каматните стапки во 2025 година, цените на акциите се под притисок. Поради ова, не се случи ни т.н. „подем на Дедо Мраз“, вообичаениот раст на пазарот на крајот на годината и новата година.
Во првите денови од 2025 година немаше нови значајни вести, а насоката на берзанските индекси главно зависеше, како и лани, од движењето на цените на акциите на најголемите технолошки компании. И на повеќето европски берзи цените на акциите паднаа минатата недела. Иако лондонскиот FTSE индекс зајакна за 0,9 отсто, на 8.223 поени, но франкфуртски DAX се лизна за 0,4 отсто, на 19.906 поени, а париски CAC 1 отсто, на 7.282 поени.