Повеќе од 4.600 археолошки артефакти и 3.500 гробници се пронајдени во текот на изградба на метро линија во близина на познатите „војници од теракота“, во градот Ксиан.
Работниците, кои копале нови линии за метро на две градилишта, открија голем број археолошки остатоци, објави Бирото за културно наследство на кинеската провинција Шенси.
„Бројот на артефакти е огромен, а археолошкото наоѓалиште на кое се работи е исклучително големо“, соопштија од Бирото на социјалната мрежа Weibo.
На истражувањето работат повеќе од 1.000 археолози, пренесе China Morning Post. Се работи во три смени за да се заврши истражувањето во текот на прославата на кинеската Нова година, за да се избегне одложување на изградбата.
Градот Ксиан во текот на историјата беше седиште на 13 кинески династии и беше кинеска престолнина во текот на илјада години. Со оглед на тоа дека во градот моментално забрзано се работи на инфраструктурата, зачестија и археолошките пронајдоци.
Така, од почетокот на изградбата на новите метро линии во април минатата година, пронајдени се повеќе од 1.300 стари гробници за кои се претпоставува дека потекнуваат од шестиот до десеттиот век.
