Влатко Стојановски за првпат се најде во почетните единаесет во француската лига, додека голови прославија Бобан Николов во Унгарија и Иван Тричковски на Кипар.
Бобан Николов го постигна третиот и последен гол во гостинската победа на Фехервар кај Диосѓер. Тој погоди во 86-тата минута и го одигра целиот натпревар заедно со дефанзивецот Висар Муслиу. Ова е негов прв гол сезонава во унгарската лига откако претходно погоди еднаш и во купот.
Иван Тричковски го прослави својот гол број 11 во кипарското првенство. Неговиот АЕК загуби пред своите гледачи со 1:2 од Анортосис, а Тричко голот го постигна во судиското надополнување. Сега тој е сам на првото место на листата на стрелци на Кипар откако неговиот ривал, Шпанецот Рајо кој игра токму за Анортосис, не постигна гол и остана на 10.
Во најдобрата француска лига конечно во 15-тото коло нашиот Влатко Стојановски го забележа првиот старт. Тој се најде во почетниот состав на синоќешниот дуел дома со Мец и одигра 59 минути пред да биде заменет. Беше активен, имаше едно нафрлување кое за малку ќе завршеше со гол и покажа дека само со поголема минутажа може да го искористи потенцијалот. Инаку, натпреварот заврши 1:1.
