Топлотен бран ја нападна шпанската престолнина па жителите разладување најдоа во големиот број градски фонтани.
Живата на мадридските термометри се искачи и до 42 степен, па околу 3 и пол милион жители бараа најразлични начини за да се разладат.
Мадриѓаните ги запоседнаа парковите каде зеленилото за неколку степени ја ублажува горештината, но многумина најдоброто решение го пронајдоа во градските фонтани, иако во нив капењето е забрането.
„Дојдовме во парк затоа што базените се преполни, не може ни да се влезе. Поради работа не може да отпатуваме, така да моравме да дојдеме тука како еден начин на разладување бидејќи жештината е неподнослива“, вели еден жител на Мадрид.
„Ни треба вода, ни треба разладување. Вода, само вода ни треба“, додава друга жителка на шпанскиот главен град.
Мадрид се наоѓа во центарот на Шпанија, оддалечен од сите големи водни површини. Низ него минува реката Мансанарес, но тоа воопшто не е доволно за намалување на температурите.