Денес, на иницијатива на градоначалникот Орце Ѓорѓиевски, во просториите на Општина Кисела Вода се одржа координатива средба со скопските градоначалници, на кои се дискутираа актуелните проблеми со кои се соочуваат жителите на Скопје. Соочени и загрижени поради нефункционалноста на јавните претпријатија, кои се под надлежност на Град Скопје, едногласно донесоа одлука да се предложи до Владата и Министерството за животна средина да ги одземат ингеренциите на јавните претпријатија „Комунална хигиена“ и „Паркови и зеленило“.
„Ние имаме чести средби со моите колеги градоначалници, на кои ги евидентираме проблемите и предизвиците со кои се соочуваме и заеднички бараме решенија. Денешната координативна средба ја иницирав токму поради вакви многубројни наталожени проблеми, со кои се соочува главниот град и она што како приоритетно сите го издвоивме е нашето незадоволство и загриженоста за состојбата со јавните претприја ‘Комунална хигиена’ и ‘Паркови и зеленило’. Негрижата и неработењето на овие претпријатија резултираа со преполни контејнери, наталожен отпад насекаде и создадени депонии низ главниот град на државата. Во услови на летни температури од над 40 степени ова повеќе не е само естетски проблем туку претставува сериозна закана за здравјето и животот на нашите сограѓани. Преплавени сме од поплаки, од барања ние да направиме нешто кога веќе Градот Скопје не се грижи. И верувајте, нашата борба трае веќе долго. Нема да говорам за константните јавувања, дописи до ЈП ‘Комунална хигиена’ и до ЈП ‘Паркови и зеленило’ и до нивната шефица, градоначалничката Данела Арсовска. Ќе потсетам дека во повеќе наврати се самоорганизираме за чистење, што верувајте не е едноставно бидејќи немаме механизација, ниту човечки ресурси, а најиронично во целата ситуација е тоа што моравме да водиме и војна со градоначалничката Данела Арсовска која, замислете, минатото лето, не ни дозволи да го фрлиме собраниот отпад во Дрисла. Значи не само што јавното претпријатие во нејзина надлежност не си ја работеше работата, туку и нѐ попречуваше нас да си ги исчистиме општините и да ги заштитиме нашите граѓани од зарази“, рече Ѓорѓиевски.
„Пред неколку седмици, јас, како градоначалник на Општина Кисела Вода и неколку други градоначалници од Скопје поднесовме прекршочни пријави против ЈП ‘Комунална хигиена’. Меѓутоа, очигледно и тоа не допира до нив бидејќи градот сѐ уште тоне во ѓубре и смрдеа. Сите сме согласни дека се потребни подрастични мерки.
Оттука, денес, едногласно одлучивме да побараме одземање на ингеренциите на ЈП ‘Комунална хигиена’ и JП ‘Паркови и зеленило’ од Град Скопје и нивно предавање на централната власт, односно на Владата. Предлогот, кој го поддржаа сите градоначалници, е назначување на владин претставник кој ќе ги управува претпријатијата, а потоа и целосно трансформирање на истите. Вработените и механизацијата да бидат распределени на општините, кои сами ќе се грижат за хигиената во своите заедници.
Не смееме да дозволиме вакво неодговорно однесување, ниту од страна на раководството на Град Скопје, ниту од ‘Комунална хигиена’. Градот Скопје не е полигон за детска игра каде што некој ќе тера инает и ќе ги казнува скопјани од само нему познати причини.
Повеќе не нѐ интересира дали се работи за некадарност, мрзеливост, неспособност или што и да е причината што нашата метропола е доведена во алармантна состојба. Нашите граѓани плаќаат за услуга што не ја добиваат и тоа мора да престане. Секој граѓанин има право на чист и здрав животен простор, а ние како градоначалници сме должни да го обезбедиме тоа“, истакна градоначалникот на Општина Кисела Вода и претседател на ЗЕЛС, Орце Ѓорѓиевски.
