Грција почна да поставува челична ограда долга 27 километри, како и воени набљудувачници, на границата со Турција кај Еврос, ударната точка на т.н. Балканска мигрантска рута.
Оградата е висока пет метри, височина со која ги надминува другите огради на вакви места во Европа, како и онаа на границата меѓу САД и Мексико. Челичната ограда ќе биде зајакната и со бодликава жица.
„Подигнувањето на оградата во Еврос е најмалку што можевме да сториме за да ја обезбедиме границата и да направиме жителите на Еврос да се чувствуваат побезбедно“, рече грчкиот премиер Кирјакос Мицотакис на 17 октомври за време на обиколката на градови низ регионот.
Новите бариери ќе служат за спречување на нелегално преминување на границите и спречување на поплави, а во тој проект се инвестирани 63 милиони евра.
Покрај изградбата на новата ограда, ќе се подобри и мрежата на постоечки огради со челични арматури во висина од 4,3 метри, што е во рангот на бариери како што е онаа на границата меѓу САД и Мексико.
Грчката влада ангажираше дополнителни 400 гранични полицајци за чување на регионот Еврос, 800 во источен Егеј и 480 во други делови на грчката република, пишува Балканската безбедносна мрежа, пренесува Спутник.
За потсетување, конфликтите на границата меѓу Турција и Грција кулминираа во текот на февруари.
Мигрантите се обидоа да влезат во Грција - и ЕУ, откако Анкара ја намали контролата, односно одлучи веќе да не ги запира бегалците од Сирија кои по копно и море се обидуваат да стигнат до Европа.
Грчките граничари користеа солзавец за да растераат околу 500 бегалци и мигранти. Тогаш започнаа разни шпекулации, а на социјалните мрежи кружеа информации со видеа, во кои се наведува дека Турција обезбедува автобуси за мигрантите и ги испраќа на граничните премини со Грција и Бугарија.