Шведскиот синџир за брза мода H&M ќе укине 1.500 работни места низ своите глобални операции како дел од напорите да заштеди 2 милијарди шведски круни (184 милиони евра) годишно, во услови на забавување на продажбата и зголемени трошоци за трговците на облека.
Групацијата, која работи со повеќе од 4.600 продавници во 70 земји, вклучувајќи ја и Македонија, ги објави плановите за укинување на работните места откако профитот падна за 30% во деветте месеци до крајот на август, што делумно резултираше од крајот на нејзините операции во Русија во светлината на војната во Украина.
Компанијата затвори речиси 200 продажни места во годината до крајот на август, главно во Европа, бидејќи продажбата се префрли онлајн. Исто така, се вели дека продажбата била слаба на главните пазари во текот на летото, додека цената на суровините и превозот се зголемиле.
H&M рече дека намалувањата ќе паднат на операциите на седиштето ширум светот и нема да влијаат на персоналот во продавниците.
Објаснувајќи ги плановите за намалување на трошоците за време на последниот финансиски извештај во септември, Хелена Хелмерсон, извршна директорка на H&M, рече дека компанијата не можела да го пренесе целосното влијание на зголемените трошоци на купувачите.
„Во ситуација на висока инфлација каде што трошоците за живот на домаќинствата значително се зголемуваат, поважно е од кога било да им се понуди на клиентите најдобра вредност за парите“, рече таа.
Во септември, компанијата рече дека продажбата на почетокот на летото била слаба на многу од нејзините големи пазари, но подоцна се подобрила. Компанијата се очекува да открие дополнително затегнување на продажбата и профитот следниот месец.
