Бил Гејтс наводно се обвинувал себеси за разводот од сопругата Мелинда, како што објави New York Post, цитирајќи ги зборовите на неименуван учесник на годишната конференција Allen & Co, позната како „летен камп за милијардери“.
Соосновачот на компанијата Microsoft, наводно, го кажал тоа за време на делот со прашања и одговори на конференцијата што се одржа во американското одморалиште Сан Вели.
Според еден од присутните, Гејтс признал дека „ја зафркнал работата“, алудирајќи на тоа дека тој е виновен за разводот.
„Беше емотивен кога зборуваше за тоа. Скоро на раб да се расплаче“, тврди изворот, додавајќи дека Гејтс не го употребил зборот „афера“ кога зборувал за разводот.
Друг учесник рече дека неговото излагање било „многу трогателно“, додека друг извор го критикуваше милијардерот бидејќи одбивал да комуницира со другите учесници на конференцијата. Наводно, Гејтс делувал„вознемирено“ за време на настанот.
Марк Сузман, извршен директор на Фондацијата Бил и Мелинда Гејтс, најави план за итни случаи „за да се обезбеди континуитет во работата на фондацијата“, и тоа само околу два месеци откако Гејтс и неговата сопруга соопштија дека планираат да се разведат, ветувајќи сепак, дека ќе продолжат да работат заедно во нивната добротворна фондација.
„Ако по две години, кој било од нив одлучи дека не може да продолжи да работи заедно на чело на фондацијата, Мелинда Гејтс ќе поднесе оставка како копретседател и комесар“, објасни Сузман.
Извршниот директор исто така рече дека според ваквото сценарио, соосновачот на Microsoft ќе остане на чело на Фондацијата и, во суштина, би можел да го „откупи“ делот на Мелинда од фондацијата.
